حوزہ نیوز ایجنسی| ولادت با سعادت امام سجاد علیہ السلام کے موقع پر شاعر اہلبیت (ع) حجۃالاسلام والمسلمین مولانا عسکری امام خاں جونپوری کے اشعار قارئین کی خدمت میں حاضر ہے:

مل گئی ایماں کی دولت آگئے زین العباء

بھر گیا دامان حاجت آگئے زین العباء

تہنیت اہل مودت آگئے زین العباء

ہو ادا اجر رسالت آگئے زین العباء

ہو کا عالم نزع کا ہنگام ، غم کا دور تھا

لیکے پیغام مسرت آگئے زین العباء

تہنیت کو عرش والے سب زمیں پر آگئے

ہو گئی جنت میں خلوت آگئے زین العباء

کہہ رہی ہے اہل ایماں سے یہ خود ان کی جبیں

بڑھ گیا لطف عبادت آگئے زین العباء

آج تک دیکھا تھا زور بازوئے حیدر مگر

صبر کی دیکھیں گے طاقت آگئے زین العباء

کعبہ دل نور ایمانی سے ہو گا ضوفگن

اہل ایماں کو بشارت آگئے زین العباء

چشمہ فیض الہی ہے غنیمت جانئے

حامل بار امامت آگئے زین العباء

اب ملے گی سجدہ خالق کو معراج کمال

بن کے تو قیر عبادت آگئے زین العباء

شوق دیدار مدینہ تھا تو پہلے سے مگر

بڑھ گیا شوق زیارت آگئے زین العباء

اے یزید نحس ہمت ہے تو پھر دربار میں

کیوں نہیں لیتا ہے بیعت آگئے زین العباء

ہے یقیں سب کی مرادیں آج ہوں گی مستجاب

کھل گیا باب اجابت آگئے زین العباء

عسکری مل کر مناؤ جشن میلاد امام

اس سے بڑھ کر کیا سعادت آگئے زین العباء